Bu yılnıñ başından berli ilhaq etilgen Qırımda ayvanlarnıñ 9 quturuv adisesi qayd etildi. Bunı Rusiye nezaretindeki Qırım Devlet veterinariya komiteti reisiniñ müavini Anastasiya Lisovskaya-Çudinoviç bildirdi.
"Yılnıñ başından berli Qırımda 9 quturuv adisesi qayd etildi, bu keçken 2019-ıncı yılnıñ aynı müddetine köre eki kere azcadır. Qırım Devlet veterinariya komiteti, ayvanlarnıñ quturuv hastalığından aşılamasınen oğraşa", - dedi Lisovskaya-Çudinoviç.
Aprelniñ soñunda Bağçasaray rayonında ayvanlarnı aşılap başladılar.
Daa evel bildirile edi ki, Qırımnıñ Cenübiy yalısınıñ dağ-orman mıntaqasında kiyik ayvanlarnı quturuv hastalığına qarşı ilâc berip başladılar.
2019 senesi dekabr ayında İslâm Terek (Kirovskoye) rayonınıñ Camçı (Tokarevo) köyü yanında ayvan quturuvınıñ yañı adisesini qayd ettiler.
Daa evel haber etile edi ki, Köktöbel yalısında tapılğan tilki leşi sebebinden ve Aqmescit rayonınıñ Mirnıy qasabasında ise - mışıqnıñ qurturuvı içün karantin ilân etildi.
Quturuv - Rabiesvirus qurturuv virusından peyda olğan infektsiya hastalığıdır. Qurturuv virusı ayvanlarda ve adamlarda spetsifik entsefalitniñ sebebi ola. Hasta ayvan tişlegende tükürçiknen tarqatıla.
