«Qırım birdemligi» cemaat birleşmesiniñ mühbiri Zidan Acikelâmovğa «tahqiqat tedbirleri» ile bir qaç polis ve FSB hadimi keldi. Bunı Qırım.Aqiqatqa birleşmeniñ faalleri bildirdi.
Faallerniñ malümatına köre, Acikelâmovnıñ ana-babasınıñ evinde de polis hadimleri buluna.
«Eylemler, İçki rayonı, İçki qasabası, Turgeneva soqağı 30-nci ev adresinde keçirile. Ev teşkermesi İçki rayon mahkemesiniñ qararı esasında yapıla. Zidan Acikelâmov, «Qırım meselesi» programmanıñ müellifi ve alıp barıcısı, «Qırım birdemliginiñ» operativ mühbiri ve jurnalisti», – dep aytıp berdiler birleşmede.
Diger tafsilâtlar yoq, Rusiye qanun qoruyıcı organlarınıñ tefsirleri de yoq.
Qırımnıñ Aqmescit rayonında mayısnıñ 11-nde Rusiye quvetçileri Özbekistan vatandaşı Nabi (Ayub) Rahimovnı tintüv vaqtında atıp öldürdi. Resmiy versiyağa köre, erkek «qıdıruvğa ilân etilgen halqara terror teşkilâtınıñ azası olıp», FSB hadimlerine qarşı ateş açtı.
Mayısnıñ 12-nde Rusiye nezaretinde olğan İçki rayon mahkemesi, mayısnıñ 11-nde Rusiye quvetçileri tarafından atıp öldürilgen Özbekistan vatandaşı Nabi (Ayuba) Rahimovnıñ apayını Sohiba Burhanovanıñ memleketten çıqarımasına qarar berdi.
Qırımlı jurnalist ve faallerniñ evlerinde keçirilgen tintüvler
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
