Tutulğan qırımtatar faalleri Lutfiye Zudiyeva ve Mümine Saliyevanıñ advokatlarını Aqmescitteki Rusiye Ekstremizm ile küreş merkeziniñ binasına kirsetmeyler. Qırım.Aqiqat mühbiriniñ bildirgenine köre, daa bir qaç advokat Aqmescitniñ Rusiye Kyiv rayon mahkemesinde «nevbetçilik yapa».
Tutulğan faaller aqqında bir malümat yoq. Lutfiye Zudiyevanıñ ömür arqadaşı Seytasan politsiya hadimlerine apayı tutulğanını añlata.
«Eki saat devamında meni ve Lilâ Gemecini (qırımlı advokat – QA) müvekkilerimizge kirsetmeyler, «E» Merkezinde olarnıñ vaziyeti aqqında bilmeyim. Bir buyruqqa esaslanıp kirsetmeyler», – dep tarif etti advokat Emil Kurbedinov.
Qırım.Aqiqat mühbiriniñ bildirgenine köre, uquq qoruyıcı organlarınıñ hadimleri qanunsız aktsiyalarnıñ keçirilmesi yasaqlanğanına dair tenbiler seslendirmekte.
«E» Merkeziniñ binası yanında tahminen 20 insan toplaştı, olar faallerge qoltutmağa keldi.
Ekstremizm ile küreş merkeziniñ hadimleri Zudiyeva ve Saliyeva tutulğanını izaatlamay.
Rusiye quvetçileri mayısnıñ 30-nda eki qırımtatar faalini tuttı: aq qorçalayıcı ve vatandaş jurnalisti Lutfiye Zudiyevanı ve Bağçasaraydaki «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyevanı.
Ekisi de Rusiye Memuriy cinayetler kodeksiniñ 20.3 maddesine istinaden qabaatlana – yasaqlanğan timsallerniñ numayışı. İşbu madde boyunca memuriy apis cezası berile.
