Qırımda tintüvlerden soñ tutulğan sekiz kişi Aqmescitteki Rusiye FSBsiniñ idaresine ketirildi. Bunı adliyeci Rustem Kâmilev Qırım.Aqiqat mühbirine bildirdi.
«Er kes Frankoda (soqağında) FSBde buluna. 205.5 maddesiniñ kimi birinci, kimi ekinci qısmına istinaden qabaatlana, sorğuğa çekile. Advokatlar davağa birer-birer kire», – dep tarif etti Kâmilev.
Adliyeciniñ qayd etkenine köre, quvetçiler «Hizb ut-Tahrir» teşkilâtınıñ eki yañı «bölügini» şekillendirdi: Qarasuvbazar rayonında üç kişi tutuldı, Aluşta ve civarlarında – dört insan, tutulğan Eskender Suleymanov ise qardaşı Ruslan Suleymanovnıñ Aqmescitteki ekinci «Hizb ut-Tahrir davasına» qoşuldı.
İmaye, bugün saat 17:00-da Rusiye kontrolindeki Aqmescit Kiyev rayon mahkemesinde sekiz er adamnıñ sıñırlav tedbiri belgilenecek, dep bekley.
Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ 8 er adam tutuldı. Bu aqta Qırım.Aqiqat mühbiri bildire.
Rusiye FSBsi tahqiqat tedbirleri 205.5 maddesi (terror teşkilâtınıñ faaliyetini teşkil etüv ya da iştirak etüv) boyunca cinaiy dava çerçivesinde keçirile ve «Hizb ut-Tahrir» teşkilâtınen bağlı, dep bildirdi.
Ukraina uquq qoruyıcı organları Qırımda Rusiye quvetçileri keçirgen tintüvlerden sebep cinaiy tahqiqat başlattı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
