Qurman rayonınıñ Büyük Onlar (Oktâbrskoye) qasabasında fevral ayında Rusiyede yasaqlanğan «Hizb ut-Tahrir» teşkilâtınıñ «bölügini» qurğanında qabaatlanıp apiske alınğan Rustem Emirüseinovnıñ babası Reşat Emirüseinov Rusiye uquq qoruyıcılarınıñ areketlerine qarşı bir kişilik narazılıq aktsiyasına çıqtı. Bu aqta o, Qırım.Aqiqatqa tarif etti.
«Eki ay evelsi, fevralniñ 14-nde, oğlum Rustem Emirüseinov tevqif etildi. Onı alıp terrorizmde qabaatlağanlarınen razı olmağanımnı bildirmek içün bugün bir kişilik narazılıq aktsiyasına çıqmağa qarar aldım. Oğlumdan ğururlanam, dep aytmağa isteyim, lâyıq bir insannı terbiyeledim, ne onıñ, ne musulmanlarnıñ, ne de menim qırımtatar halqımnıñ terrorizmnen iç bir alâqası yoq», – dedi o.
Narazılıq aktsiyası başlağanından 20 daqqa keçkeninen Emirüseinovnıñ yanına politsiya patruli keldi.
«Qasabamızdaki politsiya hadimleri. Eki kişi ediler, pek nezaketli oldılar. Bu mesele başqa yollarnen çezile bile dep, narazılıq aktsiyasına ne içün çıqqanımnı soradımlar. Dedim ki, bizim vaziyetimizde bu meseleni al etmek zor, şu sebepten yazuvlı şiar alıp çıqtım. Birazdan adiy urbada insannı ketirip, maña malümat bermege teklif ettiler – men razı olmadım. Soñra oğluñıznı azat etmege yardım etermiz dep, uquqiy hızmet teklif etkenler, men ise buña ihtiyacım yoq, oğlumnıñ advokatı bar dedim», – dep qoştı tevqif etilgenniñ babası.
Fevralniñ 14-nde Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emirüseinov alındı.
Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
