Qara cumaaqşamı. Qırımda yañı tintüvler keçirildi (video)

Fevralniñ 14-nde saba evinde tintüv keçirilgen qırımlı Rustem Emirüseinovnı Aqmescitteki Rusiye FSBsi idaresine alıp ketkenler. Bu aqta «Qırım birdemliginiñ» faalleri haber ete. Bundan evel FSB idaresine Eskender Abdulğaniyev ve Arsen Abhairov alıp ketirilgen edi. «Qırım birdemligi» bildirgenine köre, tutulğan Rustem Emirüseinovnıñ babası Reşat Emirüseinov – qırımtatar milliy areketiniñ iştirakçisi. 2017 senesi avgust ayında o, Server Karametovğa qoltutuv piketine çıqqan edi. Yazuvlı şiarında «Putin, balalarımız terrorist ve ekstremist degil» dep yazılğan edi. Daa soñra «Qırım birdemliginiñ» körüşüvlerine kelip, «Qırımda qırımtatarlarğa yapılğan basqığa qarşı çıqqanını açıq-açıq ayta edi». İşğalden soñ Qırımda mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkerilip başladı. (Video: Qırım Birdemligi)