«Qırım birdemligi» birleşmesi bildirgenine köre, Qırımda «Tebliğ Cemaatı davası» boyunca mahküm etilgen qırımlı Renat Suleymanov apis cezasından soñ Rusiye koloniyasından azat etildi.
Faallerniñ malümatına köre, Suleymanov Qabarda-Balqariya Cumhuriyetindeki Rusiye Cezalarnı yerine ketirüv federal hızmetiniñ №1 koloniyasında tutuldı. O, 2017 senesi oktâbrniñ 2-nden berli apiste yattı.
Qırımdaki Rusiye FSB idaresi 2017 senesi küzde «Tebliğ Cemaatı» teşkilâtınıñ üç bölügi yoq etildi, dep bildirdi. Bu arekette iştirak etkeninden şübheli sayılğan qırımlılar Renat Suleymanov, Arsen Kubedinov ve Talât Abdurahmanov, Seyran Mustafayev apiske alınğan edi.
2019 senesi yanvar ayında Rusiye kontrolindeki Qırım Yuqarı mahkemesi «Tebliğ Cemaatı davasınıñ» mabüslerine üküm çıqardı. Suleymanov 5 yıl umumiy rejim koloniyasında qalmasına üküm etildi, areket serbestligi 2 yıl sıñırlanacaq ve SİZOda tutulğan vaqtı 1 yıl bir buçuq yıl olaraq sayılacaq, dep qarar çıqarıldı. Abdurahmanov, Kubedinov, Mustafayev – 3 yıl sınav müddeti olacaq 4 yılğa üküm etildi.
«Qırım birdemligi» bildirgenine köre, Suleymanov ükümni şikâyet etken bir kişi edi, faqat istinaf mahkemesi birinci instantsiya mahkemesiniñ qararına razı oldı.
«Memorial» aq qorçalayıcı merkezi Renat Suleymanovnı siyasiy mabüs dep tanıdı.
«Tebliğ Cemaatı» – siyasetten çette turğan diniy arekettir. 1926 senesi İndistanda Mevlâna Muhammed İlyas tarafından tesis etilgen edi. Areketniñ esas maqsadı – islâmda keniş eali arasında maneviy deñişmeler yapmaq ve içtimaiy ya da iqtisadiy vaziyetine baqmadan, bütün musulmanlarğa hitap etmekten ibaret. 2009 senesi Rusiye Yuqarı mahkemesi bu teşkilâtnı ekstremistik dep tanıyaraq, faaliyetini yasaqlağan edi.
