Qırımda Kreml kontrolindeki Qırım Yuqarı mahkemesiniñ qadısı Sergey Pogrebnâk «Tebliğ Cemaatı davasında» üküm çıqardı.
«Qırım birdemliginiñ» madümatına köre, Renat Suleymanov Rusiye Ceza kodeksiniñ 282.2 maddesiniñ 1-inci qısmına istinaden 4 yıl apis cezasına ve bir yıl areketlerniñ sıñırlavına üküm etildi. Talât Abdurahmanov Rusiye Ceza kodeksiniñ 282.2 maddesiniñ 2-nci qısmına istinaden 2,5 yılğa şartlı olaraq mahküm etildi, areketleri bir yıl boyunca sıñırlana ve eki yıl sınav müddeti olacaq. Seyran Mustafayev ve Arsen Kubedinov Rusiye Ceza kodeksiniñ 282.2 maddesiniñ 2-nci qısmına istinaden şartlı apis cezalarını aldı.
Yanvarniñ 16-nda Rusiye kontrolindeki Qırım Yuqarı mahkemesinde qabaatlayıcı taraf «Tebliğ Cemaatı davasınıñ» mabüslerine 4 yıldan 5 yılğa qadar sınav müddeti olacaq apis cezalarını bermege talap etti.
Devlet qabaatlavı mahkemeden böyle ükümler çıqarmasını istedi: Renat Suleymanov – umumiy rejimli koloniyada 5 yıl apis cezası, areketleriniñ 2 yılğa sıñırlanması ve SİZOda qalğan 1 yılını bir buçuq yıl olaraq tanımaq.
Talât Abdurahmanov, Arsen Kubedinov, Seyran Mustafayevge – 3 yıl sınav müddeti olacaq 4 yıl apis cezası.
Daa evel mahkemede «Tebliğ Cemaatı» din teşkilâtı bölüginiñ davası boyunca qabaatlanğanlarğa söz berilgen edi, olar qabaatlarını tanımayıp, körüşüvlerde «ekstremist subetleri olmağanını» ayta.
Qırımdaki Rusiye FSB idaresi 2017 senesi oktâbrniñ 2-nde «Tebliğ Cemaatı» teşkilâtınıñ üç bölügi yoq etildi, dep bildirdi.
Kreml kontrolindeki Aqmescitniñ Kiyev rayon mahkemesi oktâbrniñ 3-nde qırımlı Renat Suleymanov, Arsen Kubedinov ve Talât Abdurahmanovnı «Tebliğ Cemaatı» areketinde iştirak etkeninde şeklep apiske aldı.
Qırım yarımadası Rusiye tarafından ilhaq etilgen soñ, yarımadada FSB tarafından muntazam surette jurnalist, faal, cemaatçılar tintile ve sorğuğa çekile.
Aq qorçalayıcılar bunı farqlı tüşüncenlerge saip olğanlarğa qarşı küreş dep tanıy.
«Tebliğ Cemaatı» – siyasetten çette turğan diniy arekettir. 1926 senesi İndistanda Mevlâna Muhammed İlyas tarafından tesis etilgen edi. Areketniñ esas maqsadı – islâmda keniş eali arasında maneviy deñişmeler yapmaq ve içtimaiy ya da iqtisadiy vaziyetine baqmadan, bütün musulmanlarğa hitap etmekten ibaret. 2009 senesi Rusiye Yuqarı mahkemesi bu teşkilâtnı ekstremistik dep tanıyaraq, faaliyetini yasaqlağan edi.
