Keçken yıl Qırımda 43 adam siyasiy ve diniy sebeplerge köre apis etildi, bildire Qırım uquq qoruyıcılar gruppası.
İmayecilerniñ malümatına köre, mabüslerni resmiy olaraq türlü cinaiy meddelerge köre qabaatlaylar.
"36 adam - musulman teşkilâtlarına aitliginde qabaatlanğan: 2 adam - Noman Çelebicihan adına batalyonda iştiraginde qabaatlana: 4 adam - Ukraina içün diversiya ve casuslıqta qabaatlana: 1 adam - rusiye işğalci orduları abidesine ürmetsizlik etmekte qabaatlana", - denile uquq qoruyıcılar gruppasınıñ Facebook beyanatında.
Başqa 10 qırımlığa şartlı apis ya da cöremeler maküm etildi.
Uquq qoruyıcılar Rusiye nezaretinde olğan Qırım mahkemeleriniñ siyasiy sebepli ve diniy cinaiy taqibat çerçivesinde umumen 147 apis etüv qararını qayd etti.
"Mabüslerniñ bazıları qanunsız Rusiyege çıqarılğanından sebep, qırımlılarnı apis etmek qararları Rostov vilâyeti ve Moskova mahkemelerinde alına edi. Qırım uquq qoruyıcılar gruppası Rusiye mahkemelerinde siyasiy sebepli ve diniy cinaiy taqibat çerçivesinde 151 apis etüv qararını qayd etti", - aytıp berdiler gruppada.
Rusiye apsinden azat etilgen qırımlı ukrain rejissöri Oleg Sentsov yanvarniñ 24-nde New Yorktaki BM merkezinde Ukrainanıñ halqara ortaqlarını Rusiye tutqan ukrainalı siyasiy mabüslerniñ azat etilüvi içün küreşmege devam etmesine çağırdı.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
