Rusiye apsinden azat etilgen qırımlı ukrain rejissöri Oleg Sentsov yanvarniñ 24-nde New Yorktaki BM merkezinde Ukrainanıñ halqara ortaqlarını Rusiye tutqan ukrainalı siyasiy mabüslerniñ azat etilüvi içün küreşmege devam etmesine çağırdı.
Bu aqta Sentsov Ukrainanıñ BM Daimiy temsilciligi teşkil etken tögerek masada bildirdi, dep haber ete Ukrinform.
«Ukraina ve halqara ortaqları işğal etilgen Qırım ve Rusiye apishanelerinde tutulğan insanlarımız içün küreşmege devam etmeli», – dep ayttı o.
Onıñ bildirgenine köre, halqara toplulıqnıñ ve, ilk evelâ, BMniñ vazifesi «Qırım ve Donbas işğali meselesini er vaqıt kün tertibinde tutmaqtan ibarettir».
Bundan evel Sentsov Davostaki Dünya iqtisadiyat forumını ziyaret etip, Ukrainanıñ Rusiye istilâsına qarşı küreşi aqqında ayttı.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
