Noyabrniñ 16-dan Kezlevde geceleri suv basımını eksiltip başladılar. Bu aqta şeerniñ Rusiye memuriyeti saytında haber etile.
“Voda Krım” QC DUŞ Kezlev filialı haber ete, suvnıñ tutumlı masraf etilüvi içün noyabrniñ 16-dan gece (saat 23-ten saat 5-kece) borularda suv basımı eksiltilecek. "Voda Krım” QC DUŞ Kezlev filialı muvaqqat oñaytsızlıq içün afu istey”, – dep yazıla bildirmede.
Aynı zamanda, bu sıñırlavlar ne qadar vaqıt devam etecegi aqqında aytılmay.
Noyabrniñ 17-den, Aqmescitte yañı suv berilüvi cedvelleri tayin etile. Bunıñ sebebi, “suv anbarlarınıñ toldurılması ile bağlı fena vaziyet”, dep añlattılar “Voda Krım” şirketinde.
Kreml tarafından tayinlengen Qırım "kuratorı", Rusiye baş nazir muavini Marat Husnullin yarımadada suv qıtlığı qırımlılarnıñ "hırsızlığınen" bağlı dedi.
Noyabrniñ 2-nde Rusiye kontrolindeki Qırım yolbaşçısı Sergey Aksenovnıñ bildirgenine köre, suv qıtlığını qapatmaq içün Aqmescit etrafında büyük suv yedekleri yoq, şunıñ içün akimiyet "eñ beterine azır". Ealige suv berüv cedveli, onıñ tahminlerine köre, daa eñ az bir yıl olacaq.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
