Salı kününden başlap, noyabrniñ 17-den, Aqmescitte yañı suv berilüvi cedvelleri tayin etile. Bunıñ sebebi, “suv anbarlarınıñ toldurılması ile bağlı fena vaziyet”, dep añlattılar “Voda Krım” şirketinde.
“Suv anbarlarınıñ fena seviyeleri ve ölü kölemler olmaması içün ve suv teminatı turğunlaşması ile bağlı tedbirlerniñ ömürge keçirilmesine qadar, “Voda Krım” Aqmescit filialı noyabrniñ 17-den yañı suv berilüvi cedvellerini sınap başlamağa mecbur: salı, çarşenbe, cumaaqşamı – saat 06:00-dan – saat 8:00-gece ve saat 19:00-dan – saat 21-gece; cumaa, cumaertesi, bazar – saat 18:00-den saat 22:00-gece”, – dep yazıla bildirmede.
Berilgen malümatqa köre, suv berilüi cedveli bir afta devamında sınav esnası vaqtında belgilenilecek.
Keçende, “Voda Krım” şirketiniñ başı Vladimir Bajenov, Aqmecitniñ ğarbındaki yerastı menbalardan künde 80 biñ metr kub qadar qoşma suv tulumbalanacaq, dep bildirdi.
Kreml tarafından tayinlengen Qırım "kuratorı", Rusiye baş nazir muavini Marat Husnullin yarımadada suv qıtlığı qırımlılarnıñ "hırsızlığınen" bağlı dedi.
Noyabrniñ 2-nde Rusiye kontrolindeki Qırım yolbaşçısı Sergey Aksenovnıñ bildirgenine köre, suv qıtlığını qapatmaq içün Aqmescit etrafında büyük suv yedekleri yoq, şunıñ içün akimiyet "eñ beterine azır". Ealige suv berüv cedveli, onıñ tahminlerine köre, daa eñ az bir yıl olacaq.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
