Qırımda suv anbarları ufuqları azlaşa ve eksile, bildirdi sentâbr 18-inde operativ ştabnıñ oturışında "Voda Krıma" müessisesiniñ başı Vladimir Bajenov.
"Yazıq ki, suv anbarlarınıñ ufuqları azlaşa ve eksile. Ayan suv anbarında 1,359 million kub, Aqmescit suv anbarında 6,130 million kub, Partizanskoye suv anbarında 5,952 kub metr suv bar. Bu istegenimiz qadar suv kötermege imkân bermey. Tünevin bütün suv anbarlarından 75 biñ kub suv köterdik. Amma artezian suv kele, 49 biñni pompaladıq, onıñ içün şeerge berilgen suvnıñ kölemi azlaşmadı", - ayttı Bajenov.
Soñki bir afta içinde Aqmescit sakinlerinde suv teminatı problemaları ile bağlı muracaatlar bayağı arttı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
