Cumaaqşamı künü, noyabr 7-sinde Kreml nezaretindeki Sudaq mahkemesinde Sudaq regional Meclisiniñ reisi İlver Ametovnıñ davası boyunca oturış keçirilecek. Sentâbr 27-sinde onıñ evi tintilgen edi.
Bunı noyabr 5-inde advokat Lenura Yengulatova Qırım.Aqiqatqa haber etti.
"Cumaaqşamı künü mahkeme olacaq. Nede qabaatlağanlarını alâ daa bilmeymiz. Mahkemede dava malümatınen tanışacaqmız. Amma, bizimce, eski, antikvar silânıñ toplamınıñ litsenziya bozuvları bar", - dedi Yengulatova.
Qırım.Aqiqatnıñ elinde olğan mahkeme celpnamesinde, İlver Ametovnı Rusiye memuriy kodeksiniñ 15.5 maddesine köre qabaatlaylar, dep yazılğan.
Daa evel haber etilgeni kibi, Rusiye quvetçileri, İlver Ametovnıñ Qırımtatar Milliy Meclisiniñ azası şeadetnamesini «ekspertizağa» alğanlar.
Sentâbrniñ 27-nde Sudaqta Rusiye quvetçileri İlver Ametovnıñ evini tintti.
Qırımtatar Milliy Meclisiniñ reisi Refat Çubarov bir qaç on silâlı Rusiye quvetçisi İlver Ametovnıñ evini blok etti, dep bildirdi.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.
Rusiye quvetçileri İlver Ametovnıñ evini endi tintken edi. Birinci tintüv 2015 senesi dekabr ayında, o, hastahanede olğanda, keçirilgen edi. Sebebi belli degil. 2017 senesi mayısında quvetçiler tekrar kelip, oğlunı tuttı.
