Sudaqta Rusiye quvetçileri tintüvler neticesinde qırımtatar faali, Sudaq regional Meclisiniñ reisi İlver Ametovnıñ Qırımtatar Milliy Meclisiniñ azası şeadetnamesini «ekspertizağa» alğanlar.
Advokat Nazim Şeyhmambetovnıñ Qırım.Aqiqat mühbirine bildirgenine köre, Rusiye quvetçileri tintüvlerni Rusiye Ceza kodeksiniñ 280, 282 ve 238 maddelerine istinaden cinayetlerden şübhe bar olğanı içün «tahqiqattan evel teşkerüvi çerçivesinde» keçirdi.
Tintüvler vaqtında müzey eksponatları, bazı vesiqalar alındı.
Advokat bu teşkerüv sayılğanını añlattı: «Yani asılında bir cinaiy dava yoq. Tecribemden ayta bilem ki, bu formal bir sebep, insannıñ evini tintmek, evinde bar baqmaq içün ve ilâhre. Yasaqlanğan bir şey tapsalar, ileride oña qarşı cinaiy dava açmaq ya da onı qayd etmek içün». «Bazırgân» qavesiniñ saibi İlver Ametovnıñ Qırım.Aqiqatqa tarif etkenine köre, onıñ müessisesinde mevsim devamında doquz operativ-qıdıruv tedbiri keçirildi.
«Bugün başta evime kelip, ev müzeyimden bir qaç şey alğanlar: otuzıncı yıllarnıñ naganı, süngü pıçaqlar, cenk yıllarınıñ silâsı. Men köşe yapacaq edim, müzeyde o, totlu, bir şeyge yaramay. Soñra qavege kettik, kelsem, mında endi tintüv keçireler. Er yerni darma-dağın etkenler, bir qaç şişe içki alğanlar. Bugün qavemizde mevsimni qapatacaq edik, çalışqanlarnen qayd etecek edik. Mına qayd ettik», – dep izaatladı tintüvni Ametov.
Ametovnıñ aytqanına köre, FSB hadimleri protokol tizip ketti. Qırımtatar faali Rusiye quvetçileriniñ vesiqalarını imzalamadı.
Qırım.Aqiqat mühbiriniñ bildirgenine köre, Sudaqta tintüvler yekünlendi. Rusiye quvetçileri bunı şimdilik izaatlamay.
Daa evel haber etilgeni kibi, sentâbrniñ 27-nde Sudaqta Rusiye quvetçileri İlver Ametovnıñ evini tinte.
Qırımtatar Milliy Meclisiniñ reisi Refat Çubarov bir qaç on silâlı Rusiye quvetçisi İlver Ametovnıñ evini blok etti, dep bildirdi.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.
Rusiye quvetçileri İlver Ametovnıñ evini endi tintken edi. Birinci tintüv 2015 senesi dekabr ayında, o, hastahanede olğanda, keçirilgen edi. Sebebi belli degil. 2017 senesi mayısında quvetçiler tekrar kelip, oğlunı tuttı.
