Rusiye, ilhaq etilgen Qırımda siyasiy sebepler ile 110-dan çoq adam apis etildi. Bunı Ukraina prezidentiniñ QMC-nde vekili Anton Korineviç LB.ua matbuatına intervyü bergen haber etti.
Onıñ aytqanına köre, mabüslerniñ episi Kyiv ve Moskova arasındaki deñişüv cedvellerine kirsetilgen.
"Doğru raqamnı aytmaq qıyın, çünki şimdilik qanunda "siyasiy mabüs" añlamı açıqlanmağan. Bilemiz ki, 110 adam siyasiy ve başqa sebepler ile apis etildi", - dedi Korineviç.
Ukraina prezidentiniñ Qırım Muhtar Cumhuriyetindeki temsilciligi işğal altındaki Qırımda Rusiye silâsını esaplav ve talil işi bite, dep bildirdiler.
Tünevin Yuqarı Radanıñ insan aqları vekâletlisi Türkiye ombudsmeni Şeref Malkoçqa Rusiye ve işğal altındaki Qırım apishanelerinde bulunğan ukrainalı siyasiy mabüslerniñ cedvelini berdi.
Sentâbrniñ 7-nde Ukraina ve Rusiye tutulğan şahıslarnı almaştırdı. 35 ukrainalı olğan uçaq «Borıspil» ava limanında qondı.
Ukraina prezidenti Volodımır Zelenskıynıñ Qırım.Aqiqatqa bildirgenine köre, qırımtatar faalleriniñ Rusiye apishanelerinden azat etilüvi Ukraina-Rusiye deñişiminiñ ekinci basamağı olacaq.
