Ukraina prezidentiniñ Qırım Muhtar Cumhuriyetindeki temsilciligi işğal altındaki Qırımda Rusiye silâsını esaplav ve talil işi bite, dep bildire.
Bu aqta müessise reberi Anton Korınevıç LB.ua intervyüsında ayttı.
«Eñ yaqın vaqıtta bu malümatnı derc etip, bu meseleni devlet akimiyeti organlarınen ve halqara ortaqlarımıznen laf etecekmiz, dep tüşünem. Meselâ, (Rusiye – QA) Qara deñiz flotunıñ gemilerinde «Kalibr» qanat raketaları bar, yarımadada «Bal», «Bastion» yalı raketa kompleksleri tura, «İskanderler» aqqında aytıla. Bu malümat halqara ortaqlarımızğa berilgen soñ sanktsiyalar ve basqı erte ya da keç fayda ketirecek, dep ümüt etecekmiz», – dedi Korınevıç.
2019 senesi küzde işğal etilgen Qırımda Rusiye arbiyleriniñ sayısı 31,5 biñ oldı, biñge yaqın tehnika, hususan tank, zırhlı maşina, küçlü top, aviatsiya ve flot vastaları, dep bildirdi Ukraina Tış işler naziriniñ muavini Yegor Bojok. Onıñ aytqanına köre, Rusiye ordusı ve silâsınıñ sayısı 2025 senesine qadar 1,5 qat artacaq, dep beklenile.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
