İlhaq etilgen Qırımda silâ anbarı yandı, yanğın sebebinden "Canköy" stantsiyasından "Aqmescit" stantsiyasına qadar demir yol areketi qapatıldı, dep yaza ASTRA telegram-kanalı Rusiye fevqulâde hızmetlerindeki menbağa atıf etip.
Bildirilgenine köre, yanğın avgustnıñ 6-nda aqşam, Qırımnıñ Qurman rayonındaki Leninskoye ve Zvezdnoye köyleriniñ civarında, 104 gvardiya desant-ücüm diviziyasınıñ muvaqqat yerleşken yerinde, silâ anbarında çıqqan.
Neşirniñ malümatına köre, yanğın sebebinden "Canköy" stantsiyasından "Aqmescit" stantsiyasına qadar (tahminen 100 kilometrlik yol) demiryolınıñ areketi qapatıldı.
Yanğan silâlar patladı, parçaları Zvezdnoye, Leninskoye, Andreyevka köyleriniñ mesken evleri yanında tüşti. Zarar körgenler aqqında malümat yoq. Qırımnıñ Rusiye akimiyeti vaziyetni izaatlamadı.
Yarımada ilhaq etilgen şaraitlerde muarririyet malümatnı mustaqil olaraq teşkerip olamay.
Avgustnıñ 6-nda aqşam saat beşlerde Qurman rayonınıñ Büyük Onlar köyü civarında yanğın ve patlavlar aqqında ilk haberler peyda oldı. "Krımskiy vetr" telegram kanalı derc etken videoda, kadr arqasında bir ses, ava limanı patlatılğanını ve "pek gürültülü" olğanını ayta.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
