Qırımda rusiyeliler Ukrayina destegine yapılğan grafitilerniñ üstüni boyalaylar. Soñki künler içinde Aqmescitte 100-den çoq resimniñ üstü boyalandı. Bunı "Jovta striçka" areketiniñ faalleri bildire.
"Soñki künler içinde işğalciler Aqmescitte 100 grafitiniñ üstüni boyalap çıqtı. Biz Qırım Ukrayina, Ukrayina Silâlı Quvetleri yaqınlaşqanı aqqında hatırlatamız ve bütün bular olarnı elbette açuvlata", - dep yazıla bildirmede.
Faaller Qırımnıñ Rusiye reberligi göñülliler dep adlandırılğan taqımlar teşkil eterek resimlerniñ üstüni boyalamağa, sarı şeritlerni ve vatanperver plakatlarnı üzip almağa mecbur ete ekenler.
"Biz resim yapamız, olar kelip üstüni boyalaylar. Biz ise kene resim yapamız. Qaveset etmeñiz, biz çoqmız, boyamız da çoq. Daa resim yaparmız", - dep qoştılar faaller.
Yarımadanı terk etmek mecbur olğan qırımlı "Jovta striçka" areketiniñ faali Violetta Stolârova Suspilnege intervyü berir eken, Ukrayinanı desteklegeni içün Rusiye quvetçileri tarafından taqip etilmesiniñ tafsilâtını aytıp berdi.
Evel "Jovta striçka" areketiniñ faalleri işğal etilgen Qırımda "Al tut" aktsiyanı başlattı.Aktsiyanıñ maqsadı tennis toplarında vatanperver sözleri yazmaq ve işğal etilgen şeerde tarqatmaq edi.
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayina tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını "itibardan tüşürgeninde" qabaatlanıp, memuriy ve cinaiy mesüliyetke çekile. Ukrayina prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
