Aqmescit civarındaki Şumhay (Zareçnoye) köyünde qırımtatar faali Eldar Kantimirovnıñ evinde keçirilgen tintüv vaqtında Rusiye FSBsiniñ hadimleri bir qaç kitapnı aldı. Bu aqta Kantimirovnıñ advokatı Ayder Azamatov tarif etti.
«Tintüv keçirilgende tertip bar edi. Bir şey taşlamayıp ala, baqa ve yerine qoya ediler. Bazı kitaplar alındı, tahqiqatnıñ malümatına köre, olar cinaiy davanen bağlı», – dep bildirdi Azamatov.
Advokatnıñ bildirgenine köre, Kantimirovnıñ evinde tintüv keçirmek qararını çıqarğan Aqmescit Kiyev rayon mahkemesiniñ qadısı Anton Tsikurenkonıñ qararına köre, 2019 senesi iyünniñ 5-nde müvekkili ve diger şübhelilerge qarşı Rusiye Ceza kodeksiniñ 205.5 maddesine istinaden cinaiy iş açıldı.
Azamatovnıñ aytqanına köre, Kantimirovnıñ cinaiy taqibi siyasiy sebeplernen bağlı.
«Eldar mahkemelerge faal bara, siyasiy mabüslerniñ qorantalarına yardım ete edi. Bilgenime köre, qırımtatarlarnıñ taqip etilüvine qarşı bir kişilik narazılıq aktsiyasına çıqıp, para cezasını alğan edi. O, kelişmey, dep aytmaq mümkün. Qırımnıñ şimdiki vaziyetinde bu insanlardan sahte terroristlerni yapalar», – dedi o.
Advokatnıñ qayd etkenine köre, o, tintüv vaqtında anda edi, çünki quvetçilerden evel keldi. Olar başta Kantimirovnıñ ana-babası yaşağan Aluştadaki evini tintti.
«Umumen bir qarar özü. Dört küçük balası, ömür arqadaşı ve çalışıp olamağan anası bar», – dep qoştı Azamatov.
Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ 8 er adam tutuldı. Bu aqta Qırım.Aqiqat mühbiri bildire.
Rusiye FSBsi tahqiqat tedbirleri 205.5 maddesi (terror teşkilâtınıñ faaliyetini teşkil etüv ya da iştirak etüv) boyunca cinaiy dava çerçivesinde keçirile ve «Hizb ut-Tahrir» teşkilâtınen bağlı, dep bildirdi.
Ukraina uquq qoruyıcı organları Qırımda Rusiye quvetçileri keçirgen tintüvlerden sebep cinaiy tahqiqat başlattı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
