Rusiyeniñ nezaretinde olğan Qırımnıñ Yuqarı mahkemesi qırımtatar Kazim Ametovnıñ kameradaki şaraitler yahşı olmağanı içün tazminat talabı ile bağlı Cezalarnı icra etken Fedaral hızmetiniñ istinaf şikâyetiniñ baqılmasını başqa künge qaldırdı. Bunı "Qırım aq qoruyıcı gruppası" haber etti.
"Rusiyeniñ Yuqarı mahkemesi sabıq siyasiy mabüs Kazim Ametovnıñ SİZO ve UFSİN-ge tazminat ile bağlı talabına berilgen istinaf şikâyetiniñ baqılmasını başqa künge qaldırdı, çünki cevapkârnıñ temsilcileri mahkemege kezintiler ve Ametovnıñ baquv şaraiti ile bağlı diger malümatlar olğan jurnal taqdim etmedi. Mahkeme oturışı diñleyicilerniñ iştiragi olmadan keçirildi", - dep yazıla haberde.
Qayd etilgeni kibi, mazkeme Cezalarnı icra etken Fedaral hızmetine kerekli vesiqalarnı azırlap takhdim etmek içün bir afta bergen.
Rusiye kontrolindeki Aqmescitniñ Jeleznodorojnıy rayon mahkemesi qırımtatarı Kazim Ametovnıñ SİZOğa qarşı davasını qanaatlendirip, kameradaki şaraitler yahşı olmağanı içün oña 190 000 ruble tölemesine qarar berdi.
Rusiye kontrolindeki Sudaq şeer mahkemesi 2021 senesi aprelniñ 12-nde «Veciye Kaşka davası» boyunca mahküm etilgen Kazim Ametovnıñ şartlı apis cezasını lâğu etti, mahkümiyetini bağışladı.
2020 senesi dekabrniñ 4-nde «Veciye Kaşka davasınıñ» 63 yaşında mabüsi Kazim Ametovnıñ evinde Rusiye quvetçileri tintüv keçirdi. İlk malümatqa köre, anda «tahqiqat tedbirleri» oldı. Qırımtatar milliy areketiniñ faali Nariman Celâl bildirgenine köre, FSB hadimleriniñ tintüvi Ametovnıñ oğlunen bağlı.
Ametov, evlerinde keçirilgen tintüv tafsilâtları aqqında tarif etti.
Qırım Muhtar Cumhuriyeti ve Aqyar prokuraturası ve Qırım Muhtar Cumhuriyetiniñ Milliy politsiyası cinaiy tahqiqat başlattı.
«Veciye Kaşka davası»
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
2019 senesi aprelniñ 7-nde Rusiye kontrolindeki Aqmescitniñ Kiyev rayon mahkemesi para talap etüvde qabaatlanğan «Veciye Kaşka davasınıñ» mabüslerine üküm çıqardı. Ruslan Trubaç, Bekir Degermenci ve Kazim Ametov 3 yılğa şartlı olaraq üküm etildi, 3 yıl sınav müddeti olaraq belgilendi. Asan Çapuh 3,5 yıl şartlı apis cezasını aldı, 3 yıl sınav müddeti olaraq belgilendi.
Bekir Degermenci, Asan Çapuh, Kazim Ametov ve Ruslan Trubaç qabaatlarını tanımadı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
