Qırımtatar Milliy Meclisi reisiniñ muavini, Kremlniñ sabıq siyasiy mabüsi İlmiy Ümerov, Qırımda Rusiye arbiy obyektlerinde yüz bergen bir sıra patlavlardan soñ adamlar cesürleşkenini bildire. Bunı, o, Qırım.Aqiqatqa bildirdi.
"Adamlar cesürleşti. Men bunı is etem. Bu patlavlarnı kim yapqanını ya da "sigaretni yañlış yerge atqanını" tam olaraq bilmeymiz. Amma bir şeyniñ başlaması faktı açıq şekilde körüne. Putin ise bundan memnün degil, çünki o, dögmeni basmaq vade etti, amma onı basmaq o qadar da qolay degil. Ne qadar istese de bunı öz başına yapamaz", - dep qayd etti Ümerov.
Ümerovnıñ sözlerine köre, qırımtatarlar toylarda sıq-sıq ukrayin türkülerini diñlep, oynaylar.
"Misal olaraq, qırımtatar toyu. Soñki yıllar devamında qırımtatar türkülerinden ğayrı kavkaz türkülerini de diñlemege mot olğan edi. Şimdi bu biraz deñişti, mına bu zemaneviy ukrayin türkülerini diñlemege mot oldı. Atta cenk mevzusına bağışlanğan türküler de. Deyler, öyle bir vaqıt oldı ki, biraz "qapalğan" ediler. Şimdi toy vaqtında qırımtatar bayrağı yanında ukrayin bayrağını da körmek mümkün - bu pek degerlidir", - dep saya İlmi Ümerov.
Sentâbrniñ 12-nde Qırımnıñ Rusiye yolbaşçısı Sergey Aksönov Qırımda ukrayin türküleri, hususan "Çervona kalına" ve Stefania yanğırağan toylayrnıñ iştirakçilerini cinayet mesüliyeti ile tehdit etti.
Evel Rusiye tarafdarı qırımlı bloger Aleksandr Talipov telegram kanalında onıñ malümatına köre sentâbrniñ 10-nda Bağçasarayda "Arpat" salonından olıp keçken toynıñ videosını yayınladı. Videoda toy musafirleri "Çervona kalına" ukrayin türküsini diñlep oynaylar. Bundvn ğayrı Talipov Aqmescitte olıp keçken daa bir toynıñ videosını yayınladı. Anda musafirler "Eurovision" yır yarışında ğalebe qazanğan Kalush Orchestra ukrayin taqımınıñ Stefania türküsini diñleyler.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
