Aqmescitte noyabrniñ 3-nde Rusiye mahkemesi tarafından 12 yıldan 17 yılğa qadar üküm etilgen Qurmandaki «Hizb ut-Tahrir davasınıñ» mabüsleri içün dua yapıldı. «Qırım birdemligi» birleşmesiniñ Facebookta haber etkenine köre, dua noyabrniñ 6-nda Aqmeçet qasabasında olıp keçti.
«Cemaat dua yapıp, dindaşları oğrağan terrorizm ve ekstremizm qabaatlavlarınen razı olmağanını bildire», – dep aytıla haberde.
Noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
«Facebookta çaldır ve yaz». Qurmandaki «Hizb ut-Tahrir davası» mabüsleriniñ esnası (fotoresimler)
Qurmandaki «Hizb ut-Tahrir davasınıñ» ükmüni Qırımnıñ Rusiye yolbaşçısı Sergey Aksenov izaatladı: Facebook saifesinde o, Rusiye quvet qurulışlarınıñ hadimlerine teşekkürler bildirdi.
Ukraina Tış işler nazirligi Rusiyeniñ Rostov-na-Donu Cenübiy okrugınıñ arbiy mahkemesiniñ Qurmandaki «Hizb ut-Tahrir davası» boyunca çıqarğan ükmüni takbih etti.
Ukraina Yuqarı Radasınıñ insan aqları vekâletlisi Lüdmila Denisova Rusiyeniñ Rostov-na-Donu şeerindeki Cenübiy okrugınıñ arbiy mahkemesiniñ qırımtatarlarğa qarşı çıqarğan qararını «qanunsız ve siyasiy sebepli» dep adlandırdı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
