Bağçasarayda 92 yaşında qırımtatar quyumcısı, ustaz Ayder Asanov vefat etti. Bu aqta Facebookta Qırım jurnalisti Şevket Memetov yazdı.
“Ayder ağa Asanov madencilik saasında bir sıra işhanelerde yolbaşçı, teşkilâtçı ve ustaz olaraq tanıldı. Halq arasında ise 40 ünerge saip insan edi. Çeşit çalgı aletlerinde çalmaqnen beraber, yasay ve ustalıqnen tamirley edi. Demir aletleri, maden ve çelik, baqır ve kümüş, altın ile çeşit original - özgün ciyezlerniñ ...müellifi ola. Onlarnen şagirtlerge ustazlıq etip, Bağçasaray ustahanesinde Milliy vaariyetimizni, unutılgan qadimiy asabalığımıznı ğayrıdan tiklemege sebepçi oldı”, - denile beyanatta.
Ayder Asanovnıñ cenazesi Bağçasarayda mayıs 26-sınde olacaq, dep qoştı Memetov.
Qırım quyumcısı Ayder Asanov 1928 senesi Bağçasarayda esnafçılar ailesinde doğdı. Sürgünlik vaqtında onıñ qoranyasını Özbekistanğa çıqardılar. 1990 yılı o, Qırımğa qaytıp, quyumcılıq derslerini berip başladı.
