Bağçasaraydaki Zıncırlı medresede keçirilmesi mayısnıñ 18-nden 19-na keçer gecesine planlaştırılğan Rusiyeniñ klassik muzıka kontserti ve sergisi lâğu etildi. Bu aqta «Bağçasaray tarihiy-medeniy ve arheologik müzey-qoruğınıñ» matbuat hızmeti bildire.
«2019 senesi mayısnıñ 19-na «Müzeyler gecesi» umumrusiye aktsiyası çerçivesinde keçirilmesi planlaştırılğan Qırım devlet filarmoniyasınıñ Kamera orkestriniñ kontserti ve «I-XVIII asırlarnıñ Qırım Cenübi-Ğarbiniñ savut-sabası» sergisi tehnik sebeplerden lâğu etile», – dep aytıla haberde.
Bağçasaray müzeyi Rusiye Medeniyet nazirliginen beraber mayısnıñ 18-nden 19-na keçer gecesi bir sıra tedbir keçirilmesini planlaştırğan edi. Olarnıñ arasında Zıncırlı medresede klassik muzıka kontserti de olacaq edi. İlânda aytılğanına köre, programmada Motsart, Çaykovskiy ve Glinkanıñ eserleri olacaq edi.
Qırımtatar faali Elmaz Akimovanıñ Qırım.Aqiqatqa aytqanına köre, qırımtatar halqı sürgünliginiñ 75 yılında eglence tedbirlerini keçirmek aqaretlev ola.
«Birinciden, kontsert keçirilecek yerge açuvlandım. Bu maneviy mektep ve anda örkest ile kontsert yapılacaq eken, bir şey añlamayım. Qırımda bunıñ kibi tedbirler keçirilecek başqa müzeyler qalmadımı? Ekinciden, mayısnıñ 18-nde tedbir keçirmek biñlernen qorantanı aqaretlemek ve acısını mısqıllamaq demektir. Ukrainada – qırımtatar genotsidiniñ qurbanlarını añma künü ola ve bunıñ kibi tedbirlerniñ keçirilmesini qanun yasaq ete. Rusiyede, ne yazıq ki, izin berile», – dedi Akimova.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
