İşğal altındaki Qırımda Rusiye uquq qoruyıcı organları Qırım.Aqiqatqa berilgen intervyüdaki malümatnı teşkerip başladı. Laf 17 yaşında qırımtatar Server Rasilçak ve babası Enver Rasilçaknıñ işkencege oğratıluvı aqqında kete. Bu aqta Rusiye kütleviy haber vastaları bildire.
«RİA Novosti Krım» malümatına köre, işkence aqqında malümatnı Qırımdaki Rusiye İç işler nazirligi şahsiy telükesizlik bölüginiñ hadimleri teşkere.
«Bu malümat Qırımnıñ iç işler nazirine berildi. Al-azırda Qırım cumhuriyetindeki İç işler nazirligi şahsiy telükesizlik bölüginiñ hadimleri bu malümatnı teşkere. Maqaledeki malümat tasdıqlansa, qabaatlanğanlar eñ sert mesüliyetke çekilecek», – dep bildirdi Qırım İç işler nazirliginiñ matbuat hızmeti «Otkrıtıye media» Rusiye resursına.
Berilgen malümatqa köre, teşkerüvni Qırımdaki Rusiye Tahqiqat komiteti de keçire.
Qırım uquq qoruyıcı müessiseleriniñ resmiy saytlarında böyle teşkerüvler aqqında malümat berilmey.
Server Rasilçaknıñ aytqanına köre, yanvarniñ 28-ne keçer gecesi o, babası, dostu ve qız arqadaşınen beraber maşinanen Aqmescitke ketti. Saqtaki zapravkada olarnı politsiya hadimleri toqtattı, adiy urbada olğanlar bar edi, «maşinadan aytıp», bölükke alıp ketkenler. Rasilçak, uquq qoruyıcı organlarınıñ hadimi onı qasıqqa urdı, dep ayta.
Gençniñ aytqanına köre, İç işler nazirliginiñ «Sakskiy» bölüginiñ odasında üç politsiya hadimi Serverge bunıñ sebeplerini «tüşünmege» teklik etti, soñra Rasilçaktan maşina yuvucısından para hırsızlağanını tanımasını talap ettiler. Onı elektroşokernen ve qollarnen urıp, millet mensüpliginden sebep de aqaretlegenler.
Servernen beraber maşinada olğan aydavcınıñ qız arqadaşını aydavcı şeadetnamesinden marum etecekler, dep qorquzğanlar.
Qırım.Aqiqat muarririyeti Rusiye İç işler nazirliginiñ «Sakskiy» bölüginden izaat almaq içün müessisenen şimdilik bağlanıp olamadı.
