Qırımnıñ Seyitler rayonındaki Seyitler qasabasında Rusiye politsiya hadimi faalge qırımtatar sürgünliginiñ yıllığına bağışlanğan tedbirler vaqtında milliy bayraqnıñ qullanuvını yasaqlamağa tırıştı.
Adını aytmağan faalniñ Facebookta aydınlatqan videosına köre, o, semetdeşlerinen beraber sürgünlik yıllığına bağışlanğan aktsiyağa ketkende qolunda qırımtatar bayrağı ve matem şeritini tuta edi. Olarnı politsiya hadimi toqtatıp, bayraqnı saqlamalarını talap etti. O, «Seyitler rayonınıñ memuriyet qararına esaslanğan» eken.
Seyitler rayonı memuriyetiniñ resmiy saytında qırımtatar halqı sürgünliginiñ yıllığına bağışlanğan tedbirlerde bayraqlarnı qullanuv yasağı aqqında bir şey aytılmay.
Seyitler rayonı memuriyetiniñ yolbaşçısı Sergey Grişko Qırım.Aqiqatqa izaat berip, qırımtatar milliy bayraqlarınıñ qullanuv yasağı bar olğanını inkâr etti.
«Men böyle meselelerni telefonda muzakere etmeyim. Böyle avaleler (mayısnıñ 18-nde qırımtatar milliy bayraqlarını qullanuv yasağı – QA) olmadı», – dedi Grişko.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
