Qırımda pnevmoniya hastalarınıñ sayısı arta. Eñ çoq hasta Aqmescitte, Keriçte ve Bağçasaray rayonlarında qayd etile.
Bu aqta Qırım ve Aqyardaki Rospotrebnadzor idaresiniñ yolbaşçısı Natalya Penkovskaya oktâbrniñ 21-nde yañı koronavirus yuqunçı ile küreş operativ ştabınıñ toplaşuvında ayttı.
«Kovid pnevmoniyaları bütün pnevmoniyalardan 17%-ını ala. Pnevmoniya hastalarınıñ sayısı arta, soñki üç aftada – 1213-ten 1837-ge qadar. Üç region – Aqmescit, Keriç ve Bağçasaray rayonı – hastalarnıñ 62%-ı anda», – dedi Penkovskaya.
Keçken afta hastahaneden tış pnevmoniya sayısı artqanını da qayd etken edi.
Qırımda keçken künü 203 koronavirus hastası qayd etildi. Umumen Qırımda, yerli akimiyetniñ malümatına köre, 7200 insan koronavirusqa oğradı, 113 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
