İlhaq etilgen Qırımdaki Rusiye Tahqiqat komitetiniñ idaresi Nikolayevka qasabasınıñ plâjında boynunda girâ ile tapılğan er adamnıñ ölümi sebebinden cinaiy dava açtı. Bu aqta müessiseniñ matbuat hızmeti bildire.
Tahqiqat komitetiniñ malümatına köre, dava Rusiye Ceza kodeksiniñ 105-inci maddesiniñ 1-inci qısmına (öldürüv) istinaden açıldı.
«Adamnıñ ölüm sebeplerini ögrenmek içün tahqiqat tedbirleri keçirile», – dep aytıla haberde.
Ğarbiy Qırımdaki Nikolayevka plâjında turistler boynuna girâ baylanğan er adamnıñ cesedini taptı. Şaatlar cesedi pek saqatlanğan edi, dep tarif etti.
Qırım.Aqiqat ölüniñ adını bildi. Bu adam qırımtatarı Raşid Yağyayev ola. Qardaşınıñ aytqanına köre, Raşid Yağyayev iş adamı edi.
