İlhaq etilgen Qırımda Rusiye polisiniñ hadimleri yol qazasında qabaatlı olğan ve qaza yerinden qaçqan adamnıñ şahsiyetini bilmege tırışa. Bunı Rusiye İİN-niñ Qırım idaresiniñ matbuat hızmeti haber etti.
Politsiyanıñ malümatına köre, qaza yanvarniñ 31-inde Qurman (Krasnogvardeyskoye) rayonınıñ Büyük Onlar (Oktâbrskoye) köyünde oldı.
"Moped ya da patapatnı aydağan aydavcı, gece köyde yolnıñ kenarında ketken 1982 senesi doğma ayaqmaşnacını urdı. Yol areketi qaidelerni bozıp, aydavcı qaza yerinden gizlendi", - denile beyanatta.
Müesissede, polis hadimleri qaza yerinde patapat başlığını tapqanlarını haber etti, o qaçqan aydavcınıñ başlığı olsa kerek.
"Ayaqmaşnanı aydağan adam yaralandı, onı hastahanege alıp kettiler. Polis hadimleri qaza neticesinde teşkerüv keçire", - aytıp berdiler İİN-nde.
Aqyar-Yalta trassasında Hmelnitskoye köyüniñ yanında yanvarniñ 14-ünde yol qazası oldı, onıñ neticesinde dört adam yaralandı.
Aqmescitte yanvarniñ 7-sinde "Ravon" maşnasınıñ aydavcısı, Davıdovka köyünden Kezlev şossesine taba ketkende, süratnı aştırıp, elektrika tayanğıçına uruldı.
