Mayısnıñ 11-nde Qırımda Rusiye FSBsiniñ hadimleri tarafından öldürilgen Özbekistan vatandaşı Nabi (Ayub) Rahimovnıñ apayı Sohiba Burhanova çetel vatandaşlarnıñ vaqtınca tutuv merkezinde bulunuvını temyiz etetecek ola. Bunı "Qırım birdemligi" advokta Edem Semedlâyevge atfı etip bildire.
«Advokat Edem Semedlâyev Qırımnıñ İçki rayon mahkemesine mayısnıñ 12-nden berli çetel vatandaşlarnıñ vaqtınca tutuv merkezinde bulunğan Sohiba Burhanovanıñ azat etilmesi talabı ile bir beyanat yolladı. Onıñ muracaatı Rusiye Anayasa mahemesiniñ qararına ve Avropa insan aqları mahkemesiniñ 39 qaidesine esaslana», – dep haber eteler faaller.
Mayısnıñ 12-nde Rusiye nezaretinde olğan İçki rayon mahkemesi, mayısnıñ 11-nde Rusiye quvetçileri tarafından atıp öldürilgen Özbekistan vatandaşı Nabi (Ayuba) Rahimovnıñ apayını Sohiba Burhanovanıñ memleketten çıqarımasına qarar berdi. Daa evel belli olğanına köre, Sohiba Burhanova çetel vatandaşı ya da vatandaşlıqsız şahıs tarafından Rusiyege kiriş qaidelerini ya da bulunuv rejimini bozğanında (Rusiye Memuriy bozuv kodeksiniñ 18.8 maddesiniñ 1.1 qısmı) qabaatlana.
Daa evel berilgen malümatqa köre, Qırımdaki Rusiye Tahqiqat komitetiniñ idaresi Rusiye FSBsiniñ hadimleri tarafından öldürilgen Özbekistan vatandaşı Nabi Rahimovnıñ naaşını defin etilmesi içün bermedi.
Mayısnıñ 11-nde saba faaller Qırımda İçki rayonınıñ Yanış Taqıl (Zavetnoye) köyünde Ayub Rahimovnıñ evinde keçirilgen tintüv aqqında bildirdi. Qırım Muhtar Cumhuriyetiniñ prokuraturası cinaiy tahqiqat başlattı.
Daa soñra «Qırım birdemligi» cemaat birleşmesi Aqmescit civarındaki Dubki köyünde daa bir tintüv başlandı, dep bildirdi. Anda İçki rayonı Yanış Taqıl (Zavetnoye) köyündeki evinde tahqiqat tedbirleri keçirilgen Ayub Rahimov buluna, dep tahmin etilgen edi.
Qırım ve Aqyardaki Rusiye Tahqiqat komitetiniñ idaresi «uquq qoruyıcı organları hadimleriniñ ayatına qast etkeninden» şübheli sayılğan 49 yaşında Aqmescit sakinine qarşı cinaiy dava açıldı, dep bildirdi. Müessise, erkek «operativ vazifede» olğan FSB hadimlerine qarşı ateş açtı, dep bildirdi.
Şübheliniñ adı ve soyadı, adiseniñ tafsilâtları Tahqiqat komiteti tarafından aydınlatılmay.
Qırım Muhtar Cumhuriyeti ve Aqyar prokuraturası, Özbekistan vatandaşı Ayub (Nabi) Rahimovnıñ Aqmescit civarındaki Dubki köyünde öldürilüviniñ tafsilâtlarını bilmek içün «kerekli tedbirler» alına, dep bildirdi.
