Qırım ve Aqyar musulmanları diniy idaresi eski musulman mezarlığından kemikler tapılğan İslâm Terek rayonındaki qazuv işleri toqtatılğanını haber ete.
Qırım Müftiliginiñ bildirgenine köre, böyle qarar «rayon musulmanları ve yerli din cemiyetiniñ teşebbüsi ile akimiyet organlarına yapılğan muracaat» neticesinde keçirilgen toplaşuvda qabul etildi.
Qırımnıñ regional arheologik tedqiqatlar merkeziniñ malümatına köre, qazuv işleri vaqtında 62 insannıñ qalıntıları tapıldı. Beşeriyat ekspertizasınıñ neticelerine köre, sekizi milâttan soñ 3-4-ünci asırlarğa ait. Qalğan qalıntılar 17-18-inci asırlarğa ait. Haberlerge köre, bunı tapılğan kapik, çölmek ve diger eşyalar isbatlay.
Ekspertiza daa devam ete. Arheologlarnıñ ilk malümatına köre, Qurğan yerinde 108 mezar bar, dep qayd etti QAMDİ.
«Qurğanda qazuv işlerini toqtatmağa, qazuv işleri vaqtında tarılğan qalıntılarnı musulman ananelerine köre yañıdan defin etmege qarar alındı», – dep qayd etti Qırım müftisiniñ muavini Ayder İsmailov.
Berilgen malümatqa köre, Qurğan qoralanacaq ve sıñırları qayd etilecek, tapılğan eşyalar ise toplanıp müzeyge berilecek.
Bundan evel Qırımdaki İslâm Terek rayonınıñ ğayıp olğan Ungut köyündeki musulman mezarlığından kemikler polietilen paketlerde ve karton qutularda açıq avada saqlana, dep haber etilgen edi.
Qırım Muhtar Cumhuriyetiniñ prokuraturası Qırımnıñ İslâm Terek rayonında yoq olğan Ungut köyündeki musulman mezarlığında keçirilgen «arheologik qazmalar» sebebinden Mahkemeden evel tahqiqatlar cedveline malümat kirsetti.
Ukrainanıñ vaqtınca işğal etilgen topraqlar ve memleket içinde köçip kelgen şahıslar meseleleri nazirligi Qırımda musulman mezarlıqları ve ibadet yerleri viran etilemez, dep bildirgen edi.
İslâm Terek rayonınıñ eski Ungut köyünde keçirilgen qazma işleri aqqında avgust ayınıñ soñunda qırımtatar faali Zair Smedlâyev bildirgen edi. O, bu yerde eski musulman mezarlığı bar edi, dep aytqan edi.
