Qırımnıñ İslâm Terek rayonında yoq olğan Ungut köyünde qazuv işleri keçirilgen musulman mezarlığınıñ kemiklerini arheologlar açıq avada polietilen paketlerde ve karton qutularda saqlay.
Bu aqta qazmalarnen oğraşqan arheologlarğa evni kirağa bergen qadın bildirdi. Bazarertesi künü, sentâbrniñ 16-nda, o, evge kelip, azbarda kemikler tolu qutularnı taptı.
«16-nda evime keldim. Muvaqqat evçikni bu arheologlarğa kirağa bergen edim. Azbarğa kirdim. Qutularda bu kemiklerni kördim. Şaştım. Mında mezarlıq yapqanlar! Qutularğa, paketlerge topladılar. Merumlarnıñ kemiklerini ketirgenler… Azbarda mezarlıq yapqanlar», – dedi qadın qırımtatar faali Nariman Celâl Facebookta derc etken videoda.
Tapılğan kemikler aqqında qadın qırımtatar faallerine haber etti.
«Arheologlarğa kira bergen qadın kemikler mında açıq avada yata, dep bildirdi. Keldik. Kemikler kerçekten laboratoriyalarda degil, ögrenilmey, arheologlar bunı vade etken edi… Mına bu laboratoriya, bu paketler. Demek istegenim, aytqanları ve yapqanları arasında iç bir alâqa yoq», – dep izaatladı faallerden biri.
Arheologlarnıñ kemiklerniñ tetqiqine dair izaatları yoq.
Qırım Muhtar Cumhuriyetiniñ prokuraturası Qırımnıñ İslâm Terek rayonında yoq olğan Ungut köyündeki musulman mezarlığında keçirilgen «arheologik qazmalar» sebebinden Mahkemeden evel tahqiqatlar cedveline malümat kirsetti.
Ukrainanıñ vaqtınca işğal etilgen topraqlar ve memleket içinde köçip kelgen şahıslar meseleleri nazirligi Qırımda musulman mezarlıqları ve ibadet yerleri viran etilemez, dep bildirgen edi.
İslâm Terek rayonınıñ eski Ungut köyünde keçirilgen qazma işleri aqqında avgust ayınıñ soñunda qırımtatar faali Zair Smedlâyev bildirgen edi. O, bu yerde eski musulman mezarlığı bar edi, dep aytqan edi.
Qırımnıñ Rusiye akimiyeti mezkür malümatnı daa izaatlamadı.
