Qırımda 2020 senesi yanvarniñ 10-nda «Qırım marafonı» aktsiyası çerçivesinde 2019 senesi iyül ayında Rusiye Yuqarı mahkemesi ögünde narazılıq bildirgen Bekir Gaziyev, Emin Rustemov, Mustafa Seydaliyev ve İzet Sayfulinniñ 10000 rublelik para cezalarını 10 rublelik kapiklernen tölediler.
Bu aqta «Qırım birdemligi» cemaat teşebbüsi haber ete.
Gaziyevniñ para cezası Kezlevde ödendi, qalğanları – Eski Qırımda.
Hatırlatamız, Aqmescitte dekabrniñ 2-nde «Qırım marafonı» aktsiyası çerçivesinde qırımtatar faalleri Server Mecitov ve Seydamet Gafarov iyül ayında Rusiye Yuqarı mahkemesi ögünde keçirgen narazılıq aktsiyaları içün er birine berilgen 10000 ruble para cezalarını ödedi.
Dekabrniñ 1-nde Eski Qırımda faaller Aziz Karahalilov ve Arsen Yakubov iyül ayında Rusiye Yuqarı mahkemesi ögünde keçirgen narazılıq aktsiyası içün berilgen para cezalarını 10 rublelik kapiklernen ödedi.
Daa evet haber etilgeni kibi, iyül ayında Moskvada aktsiya keçirgen qırımtatar faalleriniñ para cezalarını ödemek içün «Qırım marafonı» çerçivesinde 1 161 000 ruble toplandı.
İyülniñ 11-nde Moskvada Rusiye politsiyası Bağçasaraydaki birinci «Hizb ut-Tahrir davasınıñ» mabüslerine qoltutmaq içün Rusiye Yuqarı mahkemesiniñ binasına kelgen 45 insannı tuttı. Faallerniñ qollarında yazuvlı şiarlar bar edi: «Qırımda milliy ve diniy sebeplerden repressiyalarnı toqtatıñız», «Qırımda «terrorizm» ile küreş – farqlı fikirlernen küreştir», «Bizim balalarımız terrorist degil» ve ilâhre. Rusiye mahkemesi olarğa para cezalarını berdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
