Eski Qırımda faaller Aziz Karahalilov ve Arsen Yakubov iyül ayında Rusiye Yuqarı mahkemesi ögünde keçirgen narazılıq aktsiyası içün berilgen para cezalarını 10 rublelik kapiklernen ödedi. «Qırım birdemligi» cemaat birleşmesi bildirgenine köre, para «Qırım marafonı» aktsiyası çerçivesinde toplandı.
«Qırımda Moskva davası adını alğan dava boyunca para cezalarını ödemege başlaylar, yüzden çoq semetdeşimiz uzaq yolğa baqmadan, bu yolda masraf etilgen parağa baqmadan, işlerini qaldırıp, qanunsız şekilde qabaatlanğan ve qırımtatarı ve musulman olğanları içün 17 yılğa qadar apis cezalarını alğanlarğa qoltutmağa ketken edi. Qayd etmege isteyim ki, para cezaları qırımtatar halqımız ve halqımıznıñ problemlerinden çette qalmağanlar sayesinde tölengen», – dep bildirdi cemaat imayecisi Mustafa Seydaliyev.
Daa evet haber etilgeni kibi, iyül ayında Moskvada aktsiya keçirgen qırımtatar faalleriniñ para cezalarını ödemek içün «Qırım marafonı» çerçivesinde 1 161 000 ruble toplandı.
İyülniñ 11-nde Moskvada Rusiye politsiyası Bağçasaraydaki birinci «Hizb ut-Tahrir davasınıñ» mabüslerine qoltutmaq içün Rusiye Yuqarı mahkemesiniñ binasına kelgen 45 insannı tuttı. Faallerniñ qollarında yazuvlı şiarlar bar edi: «Qırımda milliy ve diniy sebeplerden repressiyalarnı toqtatıñız», «Qırımda «terrorizm» ile küreş – farqlı fikirlernen küreştir», «Bizim balalarımız terrorist degil» ve ilâhre. Rusiye mahkemesi olarğa para cezalarını berdi.
