Qırımda medeniy miras obyektleriniñ yüzde 44-ü restavratsiyağa muhtac — Rusiye akimiyeti

İşğal etilgen Qırımdaki medeniy miras obyektleriniñ yüzde 44-ü ziyadesi tamir etilmek kerek, dep bildirdi Rusiye Medeniyet nazirligi.

"Bugünki künde medeniy miras obyektleriniñ yekâne devlet reyestrine 2 409 medeniy miras obyekti kirsetildi. Bütün obyektler içün tehnikiy vaziyet aqqında vesiqalar tizildi ve saqlav işleri planı tizildi. Bu vesiqalarğa binaen, eñ yaqın beş yıllıq tsiklde 1070 obyektniñ saqlav işleri yapılmalı, bu ise medeniy miras obyektleriniñ yüzde 44 teşkil ete", — dep bildire nazirlikniñ malümatını TASS Rusiye devlet agentligi.

2014 senesi Qırım işğal etilgen soñ Rusiye akimiyeti yarımadanıñ medeniy miras obyektlerini nezaret altına aldı, amma olarnıñ saqlanuvı telüke altında qala. Bir çoq tarihiy abide restavratsiya etilmey, bazıları ise yoq etile ya da qanunsız "rekonstruktsiyalarğa" oğray.

Qırımtatar halqına ait olğan obyektler, hususan Bağçasaraydaki Hansaray, büyük qasevet doğura. Rusiye akimiyeti restavratsiya adı altında yapınıñ özgün elementlerini yoq etti, bu ise abideniñ tarihiy qıymetini yoq etti.

Doquz yıldan berli Qırımnıñ Rusiye akimiyeti başlatqan Han sarayınıñ büyük ve davalı restavratsiyası devam ete. Soñu öyle de körünmey.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.