Moskovadan Aqmescitke etap etilgen soñ “Ukrain diversantları davası” boyunca mahküm etilgen Volodımır Dudkanıñ sağlıq alı fenalaştı. Kene sürekli ağılar köründi.
Bunı Qırım uquq qorçalayıcı gruppasına Dukanıñ oğlu İlya Kavernikov bildirdi.
“Üç buçuq ay içinde birinci kere babamnen körüştim. SİZOnıñ müdiriyeti tarafından tibbiy yardım kösterilmey. Onıñ sürekli qursaq ağrıları bar, etap etilgen soñ daa qan basımı peyda oldı. Sonki sefer qan basımı ölçenilgende 160*100 edi. Etapqa tek biz oña bergen ilâclarımız yardımınen dayanıp oldı”, – haber etti Kavernikov.
Onıñ aytqanına köre, babası ve bu dava boyunca mahküm etilgen daa bir mabüs – Оleksiy Bessarabov – bir ayğa yaqın Moskovadan Aqmescitke etap etile edi.
“Etap vaqtında, 20 kişi içün olğan kameralarda 50-şer olğan allar da oldı”, – dedi oğlu.
Onıñ malümatına köre, belki de, kelecek afta babası ve Bessarabovnı kene Aqmescitten şiddetli rejimli koloniyalarğa etap eterler.
Oktâbr 24-ünde haber etile edi ki, "Ukrain diversantlar davası" boyunca maküm etilgen Vladimir Dudka ve Aleksey Bessarabovnı "Matrosskaya tişina" SİZOsından bilinmegen yerge avuştırdılar. Noyabrniñ 18-inde olar Aqmescit SİZOsında bulunğanı belli oldı.
2016 senesi noyabrniñ 9-nda Aqyarda «Nomos» Qırım analitik merkeziniñ hadimleri Dmitriy Ştıblikov, Aleksey Bessarabov ve yaqın dostu Vladimir Dudka tutulğan edi. Üçü de Ukraina istihbaratınıñ isteginen Qırımda diversiya azırlağanında qabaatlandı.
Rusiye kontrolindeki Aqyar şeer mahkemesi aprelniñ 4-nde «ukrain diversantları» davasınıñ» mabüsleri Vladimir Dudka ve Aleksey Bessarabovnı 14 yılğa üküm etti. Mahkeme er birine para cezasını da berdi: Dudkağa – 350 biñ ruble, Bessarabovqa – 300 biñ ruble.
Oktâbr 15-inde Rusiye Yuqarı mahkemesi imayeniñ şikâyetini red etip, Dudka ve Bessarabovnıñ ükmüni tasdıqladı.
