Link açıqlığı

Saatnıñ esas haberi

"Ukrain diversantlar davası" boyunca maküm etilgenlerni "Matrosskaya tişina" SİZOsından avuştırdılar


Vladimir Dudka (sağda) ve Aleksey Bessarabov (solda) Aqyarda mahkemede
Vladimir Dudka (sağda) ve Aleksey Bessarabov (solda) Aqyarda mahkemede

"Ukrain diversantlar davası" boyunca maküm etilgen Vladimir Dudka ve Aleksey Bessarabovnı "Matrosskaya tişina" SİZOsından bilinmegen yerge avuştırdılar. Bunıñ aqqında Qırım.Aqiqat mühbiri Bessarabovğa yazğan mektüpke SİZO müdiriyetiniñ cevabından belli oldı.

"SİZO müdiriyeti, adresat başqa müessisege avuştırılğanı içün, mektüp berilmeycegini bildire", - denile mektüpniñ cevabında.

Vladimir Dudkanıñ oğlu İlya Kavernikov, Moskova SİZOsı babası içün ilâc almaqnı red etkenini haber etti. O, Dudka ve Bessarabovnı kene Qırımğa alıp kettiler, dep tüşüne.

"SİZOda babam içün ilâclarnıalmadılar, böyle mabüs olarda yoq, dep ayttılar. Bundan ğayrı, mektüplerime de aynıcavaplar keldi. Bellesem, olarnı kene Aqmescit SİZOsına alıp keteler", - aytıp berdi Kavernikov.

2016 senesi noyabrniñ 9-nda Aqyarda «Nomos» Qırım analitik merkeziniñ hadimleri Dmitriy Ştıblikov, Aleksey Bessarabov ve yaqın dostu Vladimir Dudka tutulğan edi. Üçü de Ukraina istihbaratınıñ isteginen Qırımda diversiya azırlağanında qabaatlandı.

Rusiye kontrolindeki Aqyar şeer mahkemesi aprelniñ 4-nde «ukrain diversantları» davasınıñ» mabüsleri Vladimir Dudka ve Aleksey Bessarabovnı 14 yılğa üküm etti. Mahkeme er birine para cezasını da berdi: Dudkağa – 350 biñ ruble, Bessarabovqa – 300 biñ ruble.

Oktâbr 15-inde Rusiye Yuqarı mahkemesi imayeniñ şikâyetini red etip, Dudka ve Bessarabovnıñ ükmüni tasdıqladı.

XS
SM
MD
LG