Rusiye kontrolindeki Sudaq şeer mahkemesi qırımtatarı Seyyar Emirovqa 2013 senesi VKontakte içtimaiy ağındaki saifesine qoşqan videosı içün para cezasını berdi. Qırım.Aqiqat mühbiriniñ bildirgenine köre, qadı Yelena Sevrügina Emirovğa 1500 ruble para cezasını tayin etti.
Onı «ekstremist malümatlarını azırlav ve tarqatuv» (Rusiye Memuriy cinayetler kodeksiniñ 20.29 maddesi) boyunca qabaatladılar.
Emirovnıñ cemaat imayecisi Seytosman Karaliyevniñ aytqanına köre, mezkür video 2014 senesi Uraldaki Novıy Urengoy şeer mahkemesiniñ qararı ile yasaq etildi. Rusiye uquq qoruyıcı organlarınıñ fikirince, anda «Hizb ut-Tahrir» teşkilâtı aqqında «ekstremist malümatlar» bar.
Mahkeme oturışuvı vaqtında Emirov videonı saifesine qoşqan soñ onı bir daa baqmadı ve bugünki künde saife silingen, dep bildirdi.
Qırımtatarınıñ imayesi mahkeme qararını temyiz etecek ola.
Bugün Sudaqta Rusiye politsiyası qırımtatarı Seyyar Emirovnı ana-babasınıñ evi yanında tuttı.
Rusiye kontrolindeki Aqmescit Kiyev rayon mahkemesi mayısnıñ 31-nde qırımtatar faali ve aq qorçalayıcısı Lutfiye Zudiyevanı Rusiye Memuriy cinayetler kodeksiniñ 20.3 maddesini (yasaqlanğan teşkilâtnıñ timsallerini numayış etüv) bozğanındaqabaatlı tanıp, oña 2000 ruble para cezasını berdi. Aqmescitniñ Kiyev rayon mahkemesi qırımtatar faali, Bağçasaraydaki ekinci «Hizb ut-Tahrir davası» mabüsiniñ ömür arqadaşı Mümine Saliyevanı da Rusiye Memuriy cinayetler kodeksiniñ 20.3 maddesini (yasaqlanğan teşkilâtnıñ timsallerini numayış etüv) bozğanında qabaatlı tanıp, oña 1000 ruble para cezasını berdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
