Sudaqta Rusiye politsiyası qırımtatarı Seyyar Emirovnı tuttı. Cemaat imayecisi Seytosman Karaliyevniñ Qırım.Aqiqatqa bildirgenine köre, Seyyar iyülniñ 2-nde ana-babasınıñ evi yanında politsiya hadimleri tarafından tutuldı.
«Oña tünevin (iyülniñ 1-nde – QA) kelgen ediler, olarnen beraber ketmege rica ettiler, o, politsiya hadimleriniñ qararı olmağanından razı olmadı, bugün onı Sudaqta ana-babasınıñ evi yanında tuttılar», – dep bildirdi cemaat imayecisi.
Karaliyevniñ bildirgenine köre, al-azırda Seyyar Emirov politsiya bölüginde buluna, anda cemaat imayecisini kirsetmeyler.
«Meni bölükke almaylar, dava malümatlarını baqıp olamayım. Amma 2013 senesi «VKontakte» içtimaiy ağında paylaşqanları içün tutulğanını bildirdi», – dep qayd etti Karaliyev.
Emirovnıñ mahkemesi iyülniñ 2-nde olacaq. Memuriy dava Rusiye Memuriy cinayetler kodeksiniñ 20.29 maddesi boyunca – «ekstremist malümatını azırlav ve tarqatuv» açıldı.
İşğal etilgen Qırımnıñ müessiseleri bu malümatnı şimdilik izaatlamadı.
Hatırlatamız, Rusiye kontrolindeki Aqmescit Kiyev rayon mahkemesi mayısnıñ 31-nde qırımtatar faali ve aq qorçalayıcısı Lutfiye Zudiyevanı Rusiye Memuriy cinayetler kodeksiniñ 20.3 maddesini (yasaqlanğan teşkilâtnıñ timsallerini numayış etüv) bozğanındaqabaatlı tanıp, oña 2000 ruble para cezasını berdi. Aqmescitniñ Kiyev rayon mahkemesi qırımtatar faali, Bağçasaraydaki ekinci «Hizb ut-Tahrir davası» mabüsiniñ ömür arqadaşı Mümine Saliyevanı da Rusiye Memuriy cinayetler kodeksiniñ 20.3 maddesini (yasaqlanğan teşkilâtnıñ timsallerini numayış etüv) bozğanında qabaatlı tanıp, oña 1000 ruble para cezasını berdi.
