Qırımda Rusiye nezaretinde olğan Aqmescitniñ merkeziy rayon mahkemesi noyabrniñ 1-nde tutulğan daa yedi qırımtatarğa para cezasını berdi. Olar "Hizb ut-Tahrir davaları" boyunca Qırım garnizon arbiy mahkemesinde keçken oturuşlarğa diñleyici olaraq kelgen ediler. Bunı "Qırım birdemligi" cemaat birleşmesi cemaat imayecisi Ayder Suleymanovğa atfı etip bildire.
"Adalet olacağını iç beklemedik. Bu, özüne ve öz halqına terrorcılar ve ekstremistler lağabını taqmağa bermegen Qırım musulmanlarına basqıdır", - dep qayd etti Suleymanov.
Diger cemaat imayecisi Seyran Kamilov, qabaatlav tarafı Ülvi Aliyev ve Bilâl İbragimovğa qarşı mahkemede delil olaraq köstergen videolarda cinayet faaliyeti olmağanını ayttı.
"Videoda Aliyev özü, maskada turğanı ve iç bir kimsenen alâqada olmağanı körünip tura. Bilâl İbragimovnıñ davasındaki videoda o yoqtır. Amma buña baqmadan qadı ekisine de cöremeler tayin etti", - dedi Kamilov.
Amethan Ümerov, Seydamet Mustafayev, Ülvi Aliyev ve Zera Zinetdinovağa 10-nar biñ ruble, Mir İbragimovğa 8 biñ ruble, Bilâl İbragimov ve Enver Nimetulayevge 15-şer biñ cöremeler berilgen.
Aqmescitte noyabrniñ 1-nde Rusiye kontrolindeki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» toplaşuvına diñleyici olaraq kelgen insanlarnı tuttı. Umumen 19 kişi tutuldı. Daa soñra advokatlar olarnı rayon bölüginden yiberdiler, polis «fevqulâde vaziyetniñ peyda oluv telükesi bar olğanda areket qaidelerine riayet etmegenleri» içün 18 memuriy protokol tizdi, dep bildirdi.
Qırım Muhtar Cumhuriyeti ve Aqyar prokuraturası noyabrniñ 1-nde faallerniñ tutulmasınen bağlı cinaiy tahqiqat başlattı.
Oktâbrniñ 25-nde Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
