İyün 14-ünde saba Aqmescitniñ Krasnovka köyünde rusiye quvetçileri tutıp alğan qırımtatar Emirhan Murtazayevni yiberdiler. Şimdi o advokat İslâm Velilâyevniñ işhanesinde buluna.
“Onı yiberdiler. Onen Erkstremizge qarşı küreşken Merkeziniñ hadimleri çalıştı”, - dedi Qırım.Aqiqat tefsir berip İslâm Velilâyev.
Daa evel Qırımda Aqmescit rayonınıñ Krasnovka köyünde iyün 14-ünde rusiye quvetçileri qırımtatarlarnıñ evini tintti, dep bildirilgen edi. Tintüvden soñ Emirhan Murtazayevni tutıp, Aqmescitke alıp kettiler.
Şimdilik küç organları hadimlerinden tefsir yoq. Qırım.Aqiqat tafsilâtnı bilmege tırışa.
İyünniñ 10-nda saba Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ 8 er adam tutuldı.
Rusiye FSBsi tahqiqat tedbirleri 205.5 maddesi (terror teşkilâtınıñ faaliyetini teşkil etüv ya da iştirak etüv) boyunca cinaiy dava çerçivesinde keçirile ve «Hizb ut-Tahrir» teşkilâtınen bağlı, dep bildirdi.
Ukraina uquq qoruyıcı organları Qırımda Rusiye quvetçileri keçirgen tintüvlerden sebep cinaiy tahqiqat başlattı.
