Qırımda Aqmescit rayonınıñ Krasnovka köyünde iyün 14-ünde rusiye quvetçileri qırımtatarlarnıñ evini tintti.
Tintüvden soñ Emirhan Murtazayevni tutıp, Aqmescitke alıp kettiler, dep bildire Qırım.Aqiqat mühbiri.
“Emirhannı Aqmescitke alıp kettiler, qayda barmaq mümkün olğanını da ayttılar - Bogdana Hmelnitskogo, 4 (Ekstremizmge qarşı küreş merkezi). Tintüv vaqtında kompyuterni tutıp aldılar. Nezaketli ediler. Biz soradıq: çoqqamı alıp ketesiñiz? Bir yarım saatqa, dediler”, - dep aytıp berdi Murtazayevniñ soyu Zemine.
Tuvğanları, tintüv aqqında qararnı ve bbaşqa vesiqalarnı imzalamaqnı red etti. Olarnıñ ricasınenm quvetçilerniñ birisi bağlanuv nomerini qaldırdı, amma telefon etip baqqan soñ, o çet adamnıñ - bir esli qadınnıñ nomeri eken.
“Qırım birdemligi” cemiyeti Facebook saifesinde bildirgeni kibi, tintüv Bekir ve Emine Murtazayevlerniñ evinde yapılğan edi. Tintüv vaqtında olar ve olarnıñ oğlu Emirhan evde ediler.
Şimdilik küç organları hadimlerinden tefsir yoq. Qırım.Aqiqat tafsilâtnı bilmege tırışa.
İyünniñ 10-nda saba Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ 8 er adam tutuldı.
Rusiye FSBsi tahqiqat tedbirleri 205.5 maddesi (terror teşkilâtınıñ faaliyetini teşkil etüv ya da iştirak etüv) boyunca cinaiy dava çerçivesinde keçirile ve «Hizb ut-Tahrir» teşkilâtınen bağlı, dep bildirdi.
Ukraina uquq qoruyıcı organları Qırımda Rusiye quvetçileri keçirgen tintüvlerden sebep cinaiy tahqiqat başlattı.
