Oktâbrniñ 24-ü sabasına Qırımda daa bir insan koronavirustan vefat etti. Böylece, COVID-19-dan vefat etkenlerniñ sayısı 121 oldı. Bu aqta Rusiye kontrolindeki Qırım Sağlıq nazirliginiñ matbuat hızmeti bildire.
«Qırım Cumhuriyetindeki yañı koronavirus yuqunçı vaziyetiniñ er künlik monitoring malümatına köre, 3870 insan tibbiy közetüv altında qala, 2256-sı evde dinamik közetüv altında buluna, 1548 kişi hastahanede buluna, 66 kişi observatorlarğa alındı», – dep aytıla haberde.
Pandemiya başlağanından Qırımda 7994 COVID-19 hastası qayd etildi. 3409 insan Qırımnıñ tibbiy müessiselerinde tedaviylene, 4373 kişi tüzelgen soñ yiberildi.
Rusiye kontrolindeki Qırım yolbaşçısı Sergey Aksenov yarımadada qayd etilgen 204 yañı koronavirus hastası aqqında bildirdi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
