Rusiye kontrolindeki Qırım yolbaşçısı Sergey Aksenov yarımadada qayd etilgen 204 yañı koronavirus hastası aqqında bildirdi. Bu aqta o, Facebook saifesinde yazdı.
«Oktâbrniñ 23-nde Qırım Cumhuriyetinde 204 koronavirus hastası qayd etildi, 36-sınıñ hastalıq alâmetleri yoq edi. Umumiy hasta sayısından 161-i tibbiy yardım içün muracaat etkende qayd etildi, 42-si daa evel qayd etilgen hastalarnen alâqada oldı, 1-i (esas – QA) Ukrainadan keldi», – dep yazdı Aksenov.
Hatırlatamız, oktâbrniñ 23-ü sabasına Qırımda 205 koronavirus hastası qayd etildi. Aqyarda 1743 insan yañı koronavirus yuqunçına oğradı. 1148 kişi tüzeldi, 53 insan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
