İlhaq etilgen Qırımda çarşenbe künü saba COVID-19-dan ölgenlerniñ sayısı 18-ge keldi. Bunı Rusiye nezaretindeki Qırım Sağlıq Nazirligi bildire.
"Er kün yapılğan monitoring malümatına köre, Qırım Cumhuriyetinde 2905 adam tibbiy nezaret altında buluna, olarda 1761-i evlerdin, 287-si hastahanelerde, observatorlarda - 857-si buluna", - qayd ettiler beyanatta.
Tünevin Qırımda 14 yañı koronavirus adisesi qayd etildi.
Qırımda, Rusiye akimiyetiniñ malümatına köre, 575 yañı koronavirus hastası qayd etildi. Aqyarda 187 kişi hasta oldı. 152 insan tüzeldi, 3 kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
