Tünevin Qırımda 14 yañı koronavirus adisesi qayd etildi. Bunı Facebook saifesinde Qırımnıñ rusiyeli başı Sergey Aksönov bildirdi.
"Olardan 10-u daa evel qayd etilgen hastalarda yapılğan qırğınlıq ile küreş tedbirleri vaqtında, 5-i tibbiy yardım içün muracaat etkende qayd etildi. Episi hastahanege qoyuldı, alâqa daireleri qayd etildi", - qayd etti Aksönov.
Qırımda, Rusiye akimiyetiniñ malümatına köre, 575 yañı koronavirus hastası qayd etildi. Aqyarda 187 kişi hasta oldı. 152 insan tüzeldi, 3 kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
