İlhaq etilgen Qırımda koronavirus sebebinden Kezlev-Aqyar, Keriç-Aqmescit elektrik poyezdlerniñ yiberüvi ve Anapadan Keriç köpründen Keriç ve Keregece marşrutnıñ uzatılması keççe olacaq. Bunı "Cenübiy passajir naqliyat şirketi" bildirdi.
Bildirile ki, yañı marşrutnıñ açılması aprelniñ 11-inde yapılacaq edi.
"Qırım yarımadasındaki epidemiologiya vaziyetini közetemiz. Vaziyet normal alına kelgen soñ, poyezdimiz planlastırılğan marşrutlarda yürip başlaycaq", - dedi şirketniñ baş müdiri Aleksey İlinıh.
Daa evel Rusiye akimiyeti aprelniñ 2-sinden 14-ünece yañı naqliyat sıñırlavlarını tayin etti.
Aprelniñ 1-nden itibaren Qırımda cemaat naqliyatı tek saba ve aqşam cedvelge köre olacaq. Aqyar sakinlerine aprelniñ 1-nden itibaren acele vaziyet olmağanda evden çıqmaları yasaqlandı. Martnıñ 31-nde Aqyar akimiyeti şeer kirişlerinde blokpostlar qurdı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
