Rusiye akimiyeti aprelniñ 2-sinden 14-ünece yañı naqliyat sıñırlavlarını tayin etti. Bunıñ aqqında rusiyeli Qırım başı Sergey Aksönovnıñ buyruğında bildirile.
Vesiqağa köre, Qırımda:
- şeerlerara ve halqara avtobus yürüşleri bütünley toqtatıla;
- şeer naqliyatı cedvel boyunca saba ve aqşam bir qaç saat yürecek;
- sımarlanğan yolcular taşıması toqtatıla;
- 5-ten çoq adam sığdırğan taksilerniñ işi toqtatıla;
- 5-kece adam sığdırgan taksiler sadece Naqliyat Nazirligi razılığınen çalışa bile;
- Keriç - Anapa - Keriç poyezdiniñ işi toqtatıla;
- Qırım içinde poyezdler sadece saba ve aqşam birer kere qatnaycaq;
- deñiz naqliyatı ile adam taşıması bütünley yasaqlana.
"Aqmesit" ava limanı evelki kibi çalışa.
Aprelniñ 1-nden itibaren Qırımda cemaat naqliyatı tek saba ve aqşam cedvelge köre olacaq. Aqyar sakinlerine aprelniñ 1-nden itibaren acele vaziyet olmağanda evden çıqmaları yasaqlandı. Martnıñ 31-nde Aqyar akimiyeti şeer kirişlerinde blokpostlar qurdı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
