Mayısnıñ 1-inde koronavirus infektsiyası sebebinde 116 adam Qırım hastahanelerinde, dört hastanıñ alı ağır.
Bunı Rusiye nezaretindeki Qırım Emek ve İçtimaiy Mudafaa Nazirlikniñ başı Yelena Romanovskaya bildirdi.
Onıñ aytqanına köre, 1882 adam tibbiy nezarettedir, olardan 979 adam evde dinamik nezarettedir, 787 adam observatorlarda buluna.
"Soñki 24 saatta 105 adam nezaret altına alındı, 71 adam çıqarıldı. Hastahanelerde 116 adam bar, olardan sekizi tünevin qoyuldı. Yüz koronavirus hastasından 35-i yahşı olıp çıqarıldı. Dört hastanıñ alı ağır, 36 hasta orta ağır alda ve daa 26 adamnıñ alı yengil", - qayd etti Romanskaya.
Daa evel rusiyeli Qırım başı Sergey Aksönov bildirgeni kibi, aprelniñ 30-ında Qırımda sekiz yañı koronavirus adisesi qayd etildi, böylece umumen 100 adise oldı.
Qırımda bir çoq müessise ve teşkilâtnıñ faaliyetini toqtatqan ve vatandaşlarnıñ özüni izolâtsiya etmesini belgilegen yüksek seviyeli azırlıq rejimi devam ete. Aqyarda bu rejim mayısnıñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
